Temos na biblioteca varios exemplares de Todos teriamos que ser feministas, a conferencia de Chimamanda Ngozi Adichie, que Sushi Books publica na nosa lingua.
Recomendamos ler a recensión que aparece no blogue Trafegando Ronseis premendo na ligazón que aparece a seguir.
“Mulleres
bravas da nosa historia” é unha colección de libros
infantís orientados a dar a coñecer unha serie de mulleres
exemplares da historia da Galiza aos públicos máis novos.
Alén de contar as biografías das
protagonistas, os libros achegan actividades para realizar coas
cativas e cativos e cronoloxía. Todo para axudar a valorar a achega
das protagonistas á nosa cultura e ao noso país, ás veces ocultada
polo feito de seren mulleres.
Da colección, de Urco Editora, temos
na biblioteca Ramón Caride os catro primeiros números dedicados a
Rosalía de Castro, María Victoria Moreno, Maruja Mallo e Xulia
Minguillón.
Todos eles están ilustrados por Eva
Agra e con textos de diferentes autoras: María Lado (Rosalía de
Castro), Eli Ríos (María Victoria Moreno), Elvira
Ribeiro (Maruja Mallo) e María Reimóndez (Xulia
Minguillón). O proxecto está coordinado pola traballadora de
Urco Andrea Jamardo Seijo.
Con motivo do 8 de marzo e para reflexionarmos en conxunto sobre a situación da igualdade no noso sistema educativo e no centro, o CPI Virxe da Saleta convida a toda a comunidade educativa (estudantado, profesorado, persoal da escola, familias e veciñanza) a un encontro participativo que se desenvolverá na escola o mércores 7 de marzo desde as 15:30 ata as 16:30
A actividade quere ser unha reflexión conxunta na que todas as persoas poidamos achegar as nosas opinións, de maneira que o debate se enriqueza con xente de diferentes idades, ocupacións e experiencias.
Tentaremos dar resposta colectivamente a cuestións como a patriarcalización das escolas, as condutas machistas no centro, o coñecemento dos feminismos entre a comunidade educativa, a carga de traballo extra que o alumnado feminino soporta nas casas...
Para acompañarnos no encontro contaremos coa presenza de Antía Pousa da organización feminista Marcha Mundial das Mulleres.
une saison en enfer. repite comigo Une-Saison-En-Enfer.
trinta xeracións de meu analfabetas Eu estou aprendendo a ladrar.
marcar un nunca territorio coa epiglote
coma un cadelo coma un can de palleiro
escadelearme ata volver en min en can entón pronuncio
Walt Walt
Walt Whitman mamá.
estou aprendendo a ladrar.
póñome de cu pró sol agárrome a unha aixada e
tento imitar o son do cuco do cuco de cu pró sol entón
a miña gorxa esprémese de dor
e oulan coma nunca os futuros posibles que nos fan esbombar as veas
coma unha pota de leite na lareira.
os ollos do meu amor levan dentro
o troupeleo dos chocallos uncontrautro uncontrautro
da novena sinfonía de Gustav Mahler
mamá.
e eu míroche prós ollos prós olliños estás tan cansa
pero eu non e aquí
é o intre da furia can
escoito con atención a campá de cris
tal dos teus soños incumpridos
coma unha escultura delicada de Brancusi
de Cons tan tín Brancusi.
unha vez e outra vez o corazón grandísimo
igual ca unha cerrota andoa o outono es ti ou ou ou loba
velaquí me tés bailando berrando choutando
unha mestra gutural un volcanciño gutural
coma Virginia Woolf coma Virginia Woolf coma Virginia Woolf.
eu míroche prás mans podería lamberche as cicatrices das mans
ata que deran luz
e curarche as hernias discais cun só verso alexandrino
cunha sílaba de centeo cru cun oh-là-là e despois despois
contar unha por unha as túas canas enraizadas nas idades do mundo
a túa lingua plantígrada mamá
podería mesmo reestructurarche a osamenta
co implante dunha canción anarquista.
ás veces sinto a dor sedimentándose
lámina
por
lámina
coma a pizarra:
é un esguince emocional chantado na caluga
e para ladrar así ás veces é preciso chorar iodo
abrir os xeonllos cunha gadaña ata ver o sol tan preto
a tres centímetros do iris
mamá
eu tiña que mamar da túa médula
asombrar o mundo cando che baixa a compaixón ás caries
e ós peitos
caídos
co cansazo.
para poder ladrar eu tería que rillar durante anos
a túa alerxia ó pó á peluxe dos chopos
a túa anemia circulando en sentido inverso polo sangue
tería que ir contigo enterrar ó teu irmán de vintesete anos e
apretar a meixela para non tronzar a lingua
coa súa tuberculose mamaíña.
ben sei eu que para poder ladrar
tería que ir contigo á miña infancia
e verme case morrer deshidratada
e pregarlle á virxe na que non cres
que me devolvera á vida de tres meses e medio
e soldarme no teu colo para sempre
coma unha peza de ferro do teu ventre.
non penses que non sei que para poder ladrar
tería que ir contigo ás derradeiras horas
da mamá Carmiña agarrada ás catro puntas do seu pano
e ó teu bazo.
ben o sei ben sei eu todo
que para eu aprender este ladrido
á fin fixeron falla
mil mulleres lavando a reo no río de Saá
e mil arando e dúas mil cosendo e cinco mil
apañando cozas e garabullos no medio do monte e Ti
sobre todo ti plantando pinos nun serragoto inmenso
desaprendendo canto es
esfuracando as túas dúbidas.
Querida mamá: estou aprendendo a ladrar.
alguén me ve abríndome a queixada ata que a fendo e digo xa
xa ladro ou coma o can non non
coma Camille Claudel coma Camille Claudel coma Camille Claudel
coma Camille mamá no mármore
coma Camille
coma Walt Whitman Walter Benjamin vou mamá
vou deica ti
vou eu vou
outa
outa
Ouh...
OLGA NOVO (2004), A cousa vermella.
Le o seguinte artigo de Carlos Negro publicado por Sermos Galiza o 30 de agosto de 2017: "Olga Novo, a guímara do amor"
Isto é o noso apoio teórico imprescindíbel A poesía necesaria, Lectura e creación poética dentro da aula. Antonio García Teijeiro, Galaxia, 2009 Poetízate, Fran Alonso, Xerais, 2006 Poesía hexágono. Ollada e experiencia. Proposta e resposta nas aulas, Apiario, 2015 Aulas sen paredes, Rosalía Fernández Rial, Positivas, 2016
